អ្នកភូមិស្រែគរចាស់ប្រឈមនឹងបញ្ហាជីវភាពនិងសុខភាព
អ្នកភូមិស្រែគរចាស់ប្រឈមនឹងបញ្ហាជីវភាពនិងសុខភាព
ពលរដ្ឋដែលបដិសេធមិនទទួលសំណងពីក្រុមហ៊ុនវារីអគ្គិសនីសេសានក្រោមពីរ រស់នៅភូមិស្រែគរចាស់ និងភូមិក្បាលរមាស ស្រុកសេសាន ខែត្រស្ទឹងត្រែង ត្អូញលំបាកក្នុងការរស់នៅ និងកំពុងមានបញ្ហាសុខភាព នៅគ្រាដែលទឹកជំនន់បានពន្លិចលំនៅឋានពួកគាត់ទាំងស្រុង។ អ្នកភូមិថា ទីទួលខ្ពស់ដែលពួកគាត់កំពុងជ្រកបណ្តោះអាសន្ននោះ បានក្លាយជាកោះហ៊ុមព័ទ្ធដោយទឹក ពិបាកធ្វើដំណើរ។
ពលរដ្ឋដែលរងគ្រោះដោយទឹកជំនន់នៃទំនប់វារីអគ្គិសនីសេសានក្រោមពីរ នៅភូមិស្រែគរ និងភូមិក្បាលរមាស ចាស់ ជាង ១០០គ្រួសារ ឲ្យដឹងនៅថ្ងៃទី៤ វិច្ឆិកា ថា មកទល់ពេលនេះពុំទាន់មានកាកបាទក្រហម និងជំនួយមនុស្សធម៌របស់រដ្ឋាភិបាលមកជួយសម្រាលការលំបាករបស់ពួកគាត់នៅឡើយទេ ខណៈទឹកជំនន់បានពន្លិចភូមិពួកគាត់ទាំងស្រុងហើយនោះ។
ពលរដ្ឋរស់នៅភូមិស្រែគរចាស់ ជាជនជាតិភាគតិចឡាវ លោក ហ្វុត ឃឿន ឲ្យដឹងថា អ្នកភូមិដែលមកតាំងទីលំនៅលើទីទូលខ្ពស់កំពុងប្រឈមវិបត្តិស្បៀងអាហារ ខ្វះខាតទឹកស្អាត និងកុមារជាង ៥០នាក់ បានបោះបង់ការសិក្សាជាដើម។ លោកថា នៅទីទួលខ្ពស់ដែលអ្នកភូមិរស់នៅនោះ មានទឹកព័ទ្ធជុំវិញ បង្កការលំបាកធ្វើដំណើរទៅទីប្រជុំជន ត្រូវចំណាយពេលច្រើនជាងមុន ត្បិតស្ពានស្រែពក ត្រូវអាជ្ញាធរដកចេញ ដែលជាមូលហេតុបង្ខំឲ្យអ្នកភូមិធ្វើដំណើរតាមផ្លូវវាងរាប់រយគីឡូម៉ែត្រ ឆ្ពោះទៅខែត្រស្ទឹងត្រែង។
លោកថា មកទល់ពេលនេះពុំទាន់ឃើញអាជ្ញាធរ និងក្រុមហ៊ុនចុះផ្សព្វផ្សាយកំណត់ទីតាំងបង្កើតភូមិថ្មីនៅឡើយទេ៖ «ផ្លូវយើធ្លាប់ដើរ យើងជិះទូក ហើយផ្លូវយើងមិនដែលមានទូកដយើងត្រូវតែមានដ យើងត្រូវតែពិបាក។ ពីមុនយើងចំណាយ ១ម៉ឺន ៥ពាន់ ឥឡូវយើងចំណាយ ៣ម៉ឺន»។
អាជ្ញាធរឃុំស្រែគរ ឲ្យដឹងថា កម្ពស់ទឹកនៅឃុំស្រែគរ ឡើងដល់ ៧៨ម៉ែត្រធៀបកម្ពស់នីវ៉ូទឹកសមុទ្រ និងឡើងជិត ១០ម៉ែត្រនៅភូមិស្រែគរចាស់ បណ្ដាលឲ្យលំនៅឋានពលរដ្ឋត្រូវលិចលង់ស្ទើរទាំងស្រុង។ លើសពីនេះ ទឹកជំនន់នេះបានរាលដល់ពលរដ្ឋដែលយល់ព្រមទទួលសំណង នៅភូមិស្រែគរថ្មី ជាង ១០គ្រួសារ ខូចខាតផលដំណាំ និងផ្លូវ។
មេឃុំស្រែគរ លោក សៀក មេង្គ បារម្ភថា ផលប៉ះពាល់អវិជ្ជមានកំពុងគំរាមកំហែងដល់ការរស់នៅរបស់អ្នកភូមិ រួមមានខ្វះខាតស្បៀង ផ្លូវដែលអ្នកភូមិធ្លាប់ធ្វើដំណើរនៅកន្លែងខ្លះត្រូវទឹកកាត់ផ្តាច់ជាដើម។ លោកថា អាជ្ញាធរឃុំបានស្រង់ទិន្នន័យផលប៉ះពាល់ជាក់ស្ដែងនេះរាយការណ៍ជូនថ្នាក់លើ និងក្រុមហ៊ុនរួចហើយ រីឯក្រុមហ៊ុនឆ្លើយតបថា អាជ្ញាធរ និងក្រុមហ៊ុននឹងចុះដោះស្រាយនៅពេលចប់បុណ្យអុំទូក៖ «អាជ្ញាធរខ្ញុំ ចុះស្រង់ទិន្នន័យទុកដល់ពេលទឹកលិចឲ្យក្រុមហ៊ុនសង បែរជារលាយអស់រលីង។ អត់មានស្ថាប័នជួយចម្រុះទឹកអនាម័យ។ បញ្ហាទី៣ បាត់បង់ការរៀនសូត្រ ទាំងអនុវិទ្យាល័យ និងបឋមចូល ៥០នាក់ហើយ»។
មន្ត្រីសម្របសម្រួលសមាគមអាដហុក (ADHOC) ខែត្រស្ទឹងត្រែង លោក ហូ សំអុល យល់ថា អាជ្ញាធររដ្ឋមានករណីកិច្ចទទួលខុសត្រូវជីវភាពរស់នៅរបស់ពលរដ្ឋ និងការដោះស្រាយបញ្ហាប្រឈមជូនពលរដ្ឋ បើទោះបីជាអ្នកភូមិទាំងនោះបដិសេធមិនទទួលសំណងក្តី។
លោកកត់សម្គាល់ថា កាកបាទក្រហម និងជំនួយមនុស្សធម៌របស់រដ្ឋាភិបាល ហាក់រើសអើងចំពោះពលរដ្ឋនៅតំបន់នោះ៖ «ខាងកាកបាទក្រហមយើង ដូចមិនទាន់ឃើញជំនួយជួយគាត់ ព្រោះឥឡូវគាត់កំពុងទទួលការលំបាកហើយ។ ក្នុងនាមរដ្ឋាភិបាលយើងត្រូវតែជួយគាត់បន្តទៀត ទោះបីគាត់មិនព្រមចាកចេញក៏ដោយ ព្រោះជាសិទ្ធិរបស់គាត់ យើងមិនអាចបង្ខំគាត់បានទេ»។
របាយការណ៍អាជ្ញាធរឃុំស្រែគរ អោយដឹងថា រយៈពេលប្រមាណ ៣ខែចុងក្រោយនេះ ពលរដ្ឋជាង ៥០គ្រួសារថ្មីទៀត នៅឃុំស្រែគរ បានយល់ព្រមទទួលសំណង និងចាកចេញពីភូមិចាស់ ទៅរស់នៅភូមិថ្មី ហើយបច្ចុប្បន្នពលរដ្ឋរស់នៅឃុំក្បាលរមាស ៥៧គ្រួសារ និងឃុំស្រែគរ ជិត ៦០គ្រួសារ នៅមិនទាន់យល់ព្រមទទួលសំណងពីក្រុមហ៊ុននៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកភូមិស្រែគរចាស់ប្រឈមនឹងបញ្ហាជីវភាពនិងសុខភាព
Reviewed by sorphornmeanchey
on
4:02 PM
Rating:
Reviewed by sorphornmeanchey
on
4:02 PM
Rating:
No comments: